وكالة أوقات الشام الإخبارية
القصة بلشت مع معلم شاورما سوري متله متل بقية الناس ضاقت فيه ظروف الحياة بسورية نتيجة الأزمة والحرب باع يلي فوقه وتحته وتدين من المعارف والأصحاب شوية مصاري ليكمل مصروف السفرة وجهز أموره وصلى ركعتين استخارة وتوكل على رب العالمين متوجه إلى أم الدنيا مصر وهون بلشت الحكاية !!
كانت البداية من محل شاورما متواضع وبعدين بلشت مراحل التطور والتوسع مع اللمسات الفنية السورية والنفس العالمي بالنكهات لحد ماصار عنا تحفة فنية في عالم المأكولات بمصر الحبيبة اسمه ( كرم الشام )
صار هل المطعم حديث الشارع المصري ومافي نجم سينما ولايوتيوبر ولا مسؤول بمصر إلا وقام بزيارته من كتر شو سمع عنه !!
هو صاحب اختراع سندويشة ( الصاروخ ) بمصر طوله نصف متر بالزبط وله طريقة تحضير خاصة وأسلوب غلاف أنيق يوازي مطاعم الوجبات السريعة الأميركية
طور الوجبات السريعة بطريقة رهيبة وعمل عليها اضافات صارت حديث السوشال ميديا عنده صفحة خاصة بمصر عليها مليون متابع وفوقهم حبة بركة !!
ببساطة قصة مسافر سوري إلى مصر كان عايش عيشة 5 نجوم تحت الصفر هون إلى عيشة 5 نجوم بمصر !
تخيلوا المولات بمصر صارت تترجاه بس لحتى يجي يفتح فرع عندها باسم كرم الشام بنفتخر بكل ابن بلد سافر ونجح وأثبت نفسه خارجيا ياجماعة السوريين مبدعين بس تتوفرلهم الظروف الصح
اقرأ أيضا: 350 ألف برميل قيد الوصول..مصفاة بانياس سلّمت “محروقات” أمس 3351 طن من الفيول